یَنٕہ عشقٕہ سُدرُک مَس مٚے چوٚو

 یَنٕہ عشقٕہ سُدرُک مَس مٚے چوٚو

توٚرُمنٕہ فِکرے یِہ کیٛاہ مٚے گوٚو

سُے زانِہ یَس تورٕ آلَو گۄو

توٚرُمنٕہ فِکرے یِہ کیٛاہ مٚے گوٚو

نابُود اوسُس بامُدا

فنٕہس نِشے اوسُس جُدا

تتھ عالمَس ما ٲس زؠو

توٚرُمنٕہ فِکرے یِہ کیٛاہ مٚے گوٚو

دَر لاپتا اوسُس نہاں

عأرِفل وجوٗد اوس راہِ گان

گوس آفرید ژورَو وتَو

توٚرُمنٕہ فِکرے یِہ کیٛاہ مٚے گوٚو

عالمِ ارواح یام دراس

عالمِ آسوٗد اندر ژاس

اَتھ جایِہ کینٛہہ کالاٛہ مٚے گۄو

توٚرُمنٕہ فِکرے یِہ کیٛاہ مٚے گوٚو

اَدٕ گوس بٕہ صُغرا دَر زنَم

نَے ماز اوسُم نَے مٚے ژم

رُودُس بٕہ کینٛہہ کالا گِرَو

توٚرُمنٕہ فِکرے یِہ کیٛاہ مٚے گوٚو

اَدٕ شکلہِ آدم پٲدٕ گوس

اَکھ لچھ ژوٛوُہ ساس ہیتھ تھنٕہ پیوٚس

رُود راٛہ روانِیے شَو تٕہ رَو

توٚرُمنٕہ فِکرے یِہ کیٛاہ مٚے گوٚو

ادٕ وُچھ مٚے کیٛاہ گۄو دورِ سمسار

زاگہِ رُوٗزِتھ وُچھِم ترٛےٚ شہمار

تِمنٕے سٲتۍ جنگُن مٚے پیوٚو

توٚرُمنٕہ فِکرے یِہ کیٛاہ مٚے گوٚو

تتِہ کوٚر مٚے أکۍ اصلُک نِدا

دوٛپنم رامس نِشِہ چھی مُدا

اَدٕ در قلب اِلہام مٚے پیوٚو

توٚرُمنٕہ فِکرے یِہ کیٛاہ مٚے گوٚو

ادٕ ہیوٚت مٚے ژھانٛڈُن رام تَے

ٲخٕر لوٚبُم آرٕگامٕہ تَے

تٔمۍ زان کٔرنم ہوونم مٚے پَو

توٚرُمنٕہ فِکرے یِہ کیٛاہ مٚے گوٚو

پہلوان زٕ دِتنم باہُنر

رُستم تٕہ بیٚیِہ سام ہیتھ زٕ خنٛجر

تتِہ ہوٚم ترٛےٚ مٲری یِمو دوٛیو

توٚرُمنٕہ فِکرے یِہ کیٛاہ مٚے گوٚو

دوٛپنم گژُھن چھی شہرِ شام

روٗم وأتِتھ چھی کرُن قیام

تتِہ ماز پنُن بُزۍ بُزۍ مٚے کھیوٚو

توٚرُمنٕہ فِکرے یِہ کیٛاہ مٚے گوٚو

ژھینِتھ بٕہ ووتُس مُلکِ چیٖن

روبرو بٕہ سپدُس ہم نشین

تتِہ دَر بدن پرتَو مٚے پیوٚو

توٚرُمنٕہ فِکرے یِہ کیٛاہ مٚے گوٚو

نہٕ تورٕ کٔلِمہٕ تے نے رام رام

نہٕ تورٕ کُفر تہٕ نَے اسلام

دیٖن تَے مذہب ؤسۍ تتہِ پیوٚو

توٚرُمنٕہ فِکرے یِہ کیٛاہ مٚے گوٚو

نہٕ چھ تور مٲکِر نہٕ تھؠکن گٔرۍ

نہٕ عأبِد نہٕ زأہِد مأنتھرے گٔرۍ

توَے احد لوٕڈٲرۍ دیوانہٕ گوٚو

توٚرُمنٕہ فِکرے یِہ کیٛاہ مٚے گوٚو